【Interview】戲內人生​ EP.14 | 田蕊妮 Kristal Tin｜如何踏上演戲之路

 

大家都喜歡稱呼田蕊妮作「杜太」，多少也知道她曾是大台兩屆視后。她今天身份是收費網台《#喱騷》節目總監，並將參演舞台劇《#聖荷西謀殺案》(莊梅岩編劇)。大家未必知道的，可能是她曾是歌唱比賽冠軍，當初對演戲興趣只是一般，直到遇上杜汶澤。

田蕊妮自小喜歡唱歌，最愛跟爸爸一起唱卡拉OK，升讀中五時，在亞洲電視舉辦的《未來偶像爭霸戰》歌唱比賽勝出，還獲得合約一張。不過，她試過音卻沒當上歌手，只做過無觀眾收看的音樂節目主持，也出過一兩隻歌之類。

當年的她，沒有目標的。只知道自己由每周獲發200元零用錢，升價10倍至月薪8000元，已夠她開心，況且她只不過16、17歳。

當然，她也想不到17歳那年，在亞視訓練班遇上的杜汶澤，竟是攜手走過半生路的伴侶。「第一日返學，監製問邊個想做班代表，佢第一個舉手，心諗咁唔知醜㗎，第一個印象好差。」後來，二人熟落了，無所不談：「佢打破咗我好多標籤，譬如佢係讀男拔 (拔萃男書院)；當年覺得男女拔好難入，我話：『吓你讀過？』，點知係真嘅。」二人識於微時，由友情起步。

田蕊妮形容杜汶澤是「戲癡」，極度熱愛電影，會向她推介好電影，也會一起去看。「傾得最多係點樣演好一個角色，佢好鐘意同人傾演戲，佢有好多好新嘅諗法，同佢傾計會傾得好開心，佢亦帶咗我進入演員嘅世界。」

她自言是個幸福的新人：「因為 (亞視) 無人睇，做得好無人讚，做得差都無人話 (批評)，反而有好多空間去試。」當年的亞視更有不少優秀的編導及監製，包括已故的陳木勝及鄧衍成。

田蕊妮在亞視待了10年，參演的《縱橫四海》及《萬家燈火》，算是有口皆碑的作品：「自己算好彩，無做過茄哩啡，啱啱出道，演嘅都係有名 (字) 嘅角色，唔似杜汶澤，做路人甲乙丙，唔知仲以為佢係邊間茄哩啡公司嚟嘅。」

她還笑杜有妄想症，入亞視想當男主角：「嗰時 (男主角) 個個1米8幾，後來佢真係做到 (《我和殭屍有個約會II》)，然後去拍電影 (《無間道》、《頭文字D》、《低俗喜劇》)，竟然紅咗。」 說有志者事竟成太老土，但有夢要敢想吧。 

田蕊妮是在2009年轉投無綫電視，直到2020年4月約滿離開。其間，她憑《巨輪》姚文英 和《鬼同你OT》孫淑梅，先後獲封最佳女主角及最受歡迎女主角。

由細台走到大台，演出機會無數，享受過掌聲、歡呼聲，田蕊妮強調，演戲的滿足感不在於觀眾數目的多寡：「而係過程有無滿足感，與團隊合拍，都已經好享受。」她沒有自選最喜愛的角色：「演員就係咁，幾好或者幾差嘅角色，梗有嘢得著；唔會話有個角色完全無嘢俾到你。」

再好的角色，也有演得不順心時：「每個角色都有鐘意同唔鐘意嘅地方。」演一個角色，演員固然就是要參與創作，塑造角色，令其變得立體：「角色本身亦會有嘢注入俾你，令你下次再接另一個角色時，會有新嘅睇法。」

對於演戲，她是愈發沉醉其中：「最享受係有個劇本可以跟住 (演)；有時世界發生好多事，心諗如果有個劇本俾我跟住演就好喇。最開心係可以喺嗰幾個月，全程投入嗰個世界，咩都可以試，又唔驚出錯，錯咗可以NG，可以享受中間嗰種投入，好似發夢嘅過程，一個清醒嘅夢境。」 

由1994年到2020年，田蕊妮當了演員26年，因為杜汶澤再一次的狂想，她跳出個人舒適圈，試著當節目總監。「演員好被動，唔需要諗辦法同人溝通，只要做好角色，演員就有價值；而家做監製，要度節目，要同陌生人傾計，拍攝每日都會有問題發生，點樣move on，唔好糾結，對我係好新鮮，喺度學習緊。原來唔嘗試做，唔知我有呢個能力。」

演員有劇本跟，人生卻沒有。

田蕊妮嫁了一個喜歡狂想的丈夫，讓她也大着膽一起狂想。

大家總說杜汶澤很幸運，有田蕊妮這位那麼全心全意撐她的太太。換個角度，田蕊妮對丈夫的愛慕，實情是有增無減，風高浪急，當然是齊進齊退。

文字 | 陳零

攝製｜浪頻道